Intervista e Kryetarit të LSI-së, Petrit Vasili, për emisionin “Opinion” të Blendi Fevziut në Tv Klan

A jeni i zhgënjyer nga zgjedhjet z. Vasili?

Absolutisht nuk jam i zhgënjyer për atë që LSI-ja prodhoi. Në radhë të parë dua jo thjesht t’i falënderoj, jo thjesht t’i vlerësoj, por të nënvizoj një rol të cilin ka marrë afërsisht 230 mijë votuesit e LSI-së, që ishin pa përdorur tepri apo propagandë, por ata votues ishin misionarë dhe heronj të vërtetë, pasi janë 230 mijë vota, që janë një numër i madh e që u morën në kushtet e një terrori kriminal, policor e elektoral të padëgjuar. Këta njerëz u përballën me këtë terror, por nuk ndryshuan vullnetin e tyre. Ishin shumë qartë të vendosur në atë rol të madh që Shqipëria ka nevojë për një zë të pavarur, një zë të vërtetë, një zë që nuk shitet dhe nuk blihet, një zë që nuk frikësohet, pasi ndarjen e fundit me frikën Shqipëria e ka bërë një herë e përgjithmonë në vitin 1990 dhe nuk ka asnjë mundësi, askush që me para me kriminelë, me banda të riprodhojë ato elemente, diktatura dhe reminishenca, që shqiptarët i kanë fashitur një herë e mirë.

Kush ua bëri këtë, kush i kërcënoi shqiptarët z. Vasili?

Para se të hyj në këtë çështje, duhet ta nënvizoj këtë mision shumë të lartë që kanë kryer këto njerëz, të cilët formësuan bashkë me këtë një opozitë, që siç qe i pastër ky votim nga ana e mijëra mbështetësve dhe qytetarëve të thjeshtë për LSI-në, po kështu do të jetë edhe opozita në Parlamentin e ardhshëm. Është moment i veçantë dhe i rëndësishëm, pasi duhet vlerësuar shumë çdo mesazh i madh që nga vjen nga çdo votues, që i thotë jo të gjitha atyre që quhen fëlliqësira dhe që riprodhojë zgjedhje të deformuara.

Jeni të bindur që do të jeni në opozitë z. Vasili?

Së pari, pati një strategji të mirëmenduar, të zbatuar pikë për pikë për të bërë presion të gjithë njerëzve, me një target të caktuar të LSI-së, në radhë të parë ata njerëz që ishin pjesë e administratës publike të të gjitha niveleve, qofshin këta edhe niveli më i ulët apo nëpunës më të zakonshëm që mund të ekzistojnë dhe ky presion ishte i tillë jo vetëm ndaj tyre drejtpërdrejtë. Ky presion vinte nga Rilindja. Strategjia ishte e drejtpërdrejtë mbi këta njerëz dhe kur nuk funksionoi në pjesën dërrmuese u arrit deri aty sa të kërcënohej se do hiqeshin nga puna familjarë, që mund të mos ishin fare mbështetës të LSI. Së dyti, ka pasur një strategji të gjerë për frikësimin e votuesve për të mos marrë pjesë në votime. Së treti, ka pasur një qarkullim, ka edhe denoncime të drejtpërdrejta edhe në prokurori. Përveç të tjerave, një strategji dhune me të cilën banditët dhe elementët kriminal të policisë kanë qenë njësh me njëri-tjetrin.

Në cilat zona?

Shpërndarë proporcionalisht në gjithë territorin. Merrni të gjithë përfaqësuesit tanë në qarqe në tavolinën tuaj dhe mund t’ju japin dëshmi pa fund. Sa u përket frikësimeve, faktet kanë qenë publike: Puka, që u goditën dy gra, Shëngjini në sytë e të gjithëve në ditën e zgjedhjeve, Lezha, ku ishte edhe vetë Ilir Meta, rasti i Beratit të premten parazgjedhore ku u rrëmbye një i ri pas një takimi që z. Meta pati atje dhe u kthye Ilir Meta mbrapsht për ta liruar, sepse banda e famshme e Çelepiasit të Beratit i kishte rrëmbyer djalin pas takimit të Ilir Metës. Tjetri ishte rasti i Kuçovës, rasti i Elbasanit dhe rasti i Zharrëzës. Këtë e kam ndjekur vetë. U qëllua me levë dhe lopatë një djalë i ri që pohoi se votonte LSI-në. Kjo mund të jetë vetëm një e pesëdhjeta e rasteve të tjera.

Kur nisën tensionet mes jush dhe PS?

Kjo strategji ishte paracaktuar dhe kishte filluar muaj më pare. Strategjia precipitoi në mënyrë ekstreme muajt e fundit duke pare që të gjitha të dhënat elektorale ishin negative. Ky numër që ju shihni, 230 mijë votues për LSI-në, në një situate normale, pa dhuna, pa banda e pa terror, do të ishte dyfishi. Këtë e thonin të gjithë. Kjo dhunë dhe ky terror u bë pikërisht sepse kjo situate ishte krejtësisht e disfavorshme për PS dhe ajo pikërisht zbatoi këtë dhunë në të gjitha drejtimet.

Keni kontaktuar me Ramën

Jo, unë kam kontaktuar me të gjithë ambasadorët e akredituar në Tiranë. Pa përjashtim. Edhe në takime zyrtare kemi informuar ata me shkrim, me materiale shumë të gjata. Kemi informuar edhe Uashingtonin zyrtar.

Pse nuk keni kontaktuar me Ramën?

Nuk mund të kontaktohej me një njeri që ishte orkestruesi dhe koka e drejtimit të këtij operacioni dhe kësaj strategjie dhune, kriminale.

Ju po thoni që Rama i vodhi zgjedhjet?

Në qoftë se ka dhunë, ka terror, ka shit-blerje votash, ka largim masiv me task-forcën si Gestapo…

Task-forca mendonte se këta njerëz dilnin në fushatë dhe blinin vota.

Task-forca ka larguar në mënyrë krejtësisht të paligjshme dhe pa motiv njerëz pa lidhje me votat. Task-forca largoi një njeri si Drejtori i Përgjithshëm i Postave, duke i thënë që nuk kishte performancë të mirë në punë, pas katër vjetësh.

Task-forca nuk ishte vetëm Rama ishte edhe PD?

Patjetër PD ishte një bashke autore dhe bashke konsumuese e krimit elektoral i cili u ngjiz në 17 maj dhe prodhoi efektet.

A jeni në një situatë krejtësisht paradoksale z. Vasili? Ju bëni përgjegjës Ramën për vjedhjen e votave tuaja, për kërcënimet ndaj militantëve tuaj dhe nga ana tjetër jeni akoma në qeveri me z. Rama?

Të lutem, me mirëkuptimin tuaj, nëse doni që ta mbajmë në nivelin e bisedës për të mos e ulur në këtë nivel. Nuk ecim dot në këtë çështje. Kjo është një element thjeshtë burokracie, thjeshtë tranzitore që nuk ka lidhje fare me qëndrimin tonë politike. Ju e kuptoni që është një qëndrim i thjeshtë tranzitor burokratik. Qëndrimi politike është shumë i kthjellët dhe i qartë, ky që unë po bëj dukshëm në publik.

Përse nuk i hiqni ministrat nga qeveria?

Ky është një detyrim burokratik i cili ecën përpara. Nuk ka lidhje me qëndrimin politik. Ne kemi sot një qeveri në të cilën ndodhemi është qeveri kujdestare për zgjedhjet.

Po edhe ministrat e PD duhet të ikin?

Këtu është ngjizur një qeveri të cilat janë të paqarta dhe në funksionimin. Duhet të thërrisni bashkën për të treguar se çfarë marrëveshje ka bërë. Kjo është prodhuar në marrëveshjen e 17 majit.

Po marrëveshja juaj është prodhuar nga marrëveshja e 1 prillit?

Nuk ka lidhje 17 maji me 1 prillin!

Ministrat e qeverisë suaj qëndrojnë në kabinet ndërkohë që ju jeni në opozitë, a ka një paradoks?

Një nga gjërat thelbësore sot, është që në Shqipëri është konsumuar qartë një krim elektoral.

Jam interesuar tek blerja e votës…

Blerja e votës është bërë masivisht në të gjithë territorin. Mund të mblidhni dëshmi në të gjithë territorin. Nëse do të donit të mblidhnit dëshmi i keni në të gjithë territorin.

Vetëm PS ka blerë vota, po partitë e tjera?

Vetëm PS. Ne kemi evidentuar qartë vetëm PS.

Po ju keni blerë vota ka pasur mjaft komete në zgjedhjet e mëparshme që LSI-ja ishte avangardë…

Pikërisht ka qenë kjo se ishin këta që blinin vota, po përpiqeshin të krijonin tymnaja për të fshehur pikërisht operacionin gjigant masiv të blerjes së votave të një dimensioni të paparë në Shqipëri. Kemi parë në vitin 1996 me dhunë masive, por operacion masiv për blerjen e votave ky është pa precedent në historinë e pluralizmit shqiptar, këtë mbajeni si rekord.

Sa ka ndikuar kjo?

Po ta them që e ka deformuar në themel rezultatin dhe të vërtetën elektorale.

Në çfarë mase ka qenë blerja e votave? Sa ka ndikuar kjo në rezultat?

E ka deformuar në themel rezultatin dhe të vërtetën elektorale.

A keni ju fakte evidente që mund të përdoren në betejën legale ndaj Partisë Socialiste?

Përsa i takon fakteve, mund t’ju them që fakte ka jo vetëm nga ne, por edhe nga vëzhguesit ndërkombëtare.

Përse nuk i kanë bërë publike deri më tani?

Do t’i bëjnë së shpejti. Tërheqja e vëmendjes për shit-blerjen e votës është ngritur edhe nga misioni i OSBE – ODIHR-it si shqetësim.

Si e shpjegoni që dy aleatë, të cilët akoma ishin në koalicion dhe ishin së bashku në një betejë elektorale nuk komunikonin dhe nuk kishin asnjë relacion?

Pasi ne ishim aleati që hynte në garë për të fituar votën e shqiptarë me një program që ishte plani i vërtetë për Shqipërinë, të cilën kam pasur mundësinë që ta prezantoj dh të zbërthej edhe me ju, por edhe në çdo shesh të Shqipërisë, kurse aleati tjetër kishte vetëm planin e vjedhjes së votave dhe nuk kishte asnjë plan për Shqipërinë. Kishin një plan nacional – socialist që Shqipëria ishte e tyre. Një pjesë e shqiptarëve është e z. Rama, që nuk e kalon 20 për qindëshin, ndërsa 80 për qind e shqiptarëve nuk e votojnë z. Rama, ose votojnë LSI-në, ose votojnë Partinë Demokratike, ose refuzojnë të votojnë. Pra, Shqipëria nacional – socialiste e z. Rama nuk mund të jetë e tij me 20 për qind të votave. Ky është thjesht dhe vetëm një halucinacion hitlerian, dhe shqiptarët tashmë do të kenë mundësi për herë të parë të kenë një zë të qartë, një zë që të drejtohet në mënyrë të drejtpërdrejtë, ballore. Shqipëria do të fitojë një dimension shumë të fuqishëm të opozitës së vërtetë, një dimension që e humbi në këto katër vite.

A ishte ky z. Rama që ka qeverisur me ju, apo ndryshoi këto dy javë që doli kundër jush?

Dua t’ju sjell ndërmend faktin që ju dhe mjaft kolegë tuajt kanë thënë që opozitën e vërtetë në këto katër vjet e ka bërë LSI-a sesa Partia Demokratike.

Shumë kolegë të mi kanë thënë që keni bërë opozitë me fjalë, pasi keni votuar çdo nismë të z. Rama. Opozita është me gjeste, jo me fjalë. Kemi reformën në arsim, atë në shëndetësi…

Së pari, më thatë reformë në arsim dhe shëndetësi. Reformë në shëndetësi nuk ka pasur dhe nuk është votuar asnjëherë asnjë reformë. Madje është refuzuar të votohen edhe koncesionet. Ne kemi paraqitur një projektligj i cili u bllokua nga Partia Socialiste për një vit e gjysmë, dy vjet. Është një ligj të cilin e depozituam, filloi shqyrtimi në parlament, në komisionet përkatëse dhe me urdhër politik u bllokua nga Partia Socialiste. Ky është qëndrimi për shëndetësinë. Sa i përket ligjit të arsimit të lartë kemi pasur një qëndrim politik në parlament që 10 momentet kycce të kishin garanci me aktet nënligjore përkatëse. Angazhimi politik i tyre nuk ndodhi dhe ndaj patëm më pas një qëndrim kritik. Ata nuk i bënë aktet nënligjore që ky ligj t’i shërbente sa më mirë oligarkisë universitare. Dekreti për plehrat edhe sot e kësaj dite nuk ka kaluar sepse ne e kundërshtuam publikisht. Po për reformën në drejtësi nuk mund të mohojmë rolin kyç të LSI-së që të miratohet më konsensus. Ne ishim në qeveri që qeverisja të ishte më e mirë. Dhe kritikat dhe oponenca jonë ishte vetëm në këtë drejtim.

Ka diçka që po qarkullon se mund të ketë një nismë që PS të mos lejojë Presidentin Ilir Meta të nisë detyrën. Si e komentoni?

Për fatin e zi të tyre Ilir Meta më 24 korrik merr detyrën e tij si President i Republikës për fatin e mirë të shqiptarëve. Ilir Meta është President i shqiptarëve dhe do të marrë detyrën e tij me të gjitha obligimet që duhen në këtë vend shumë delikat për vendin. Duhet patjetër roli i një garanti dhe Ilir Meta ka pjekurinë, historinë dhe maturinë. Në këtë kohë shumë të vështirë për vendin është një fat i madh që atje ndodhet Ilir Meta.

Ditën e zgjedhjeve u shpërndanë disa deklarata të Ilir Metës dhe u deklarua se ka shkelur Kushtetutën.

Në qoftë se kishte një njeri që nuk duhet të ishte pjesë e ditës së zgjedhjeve ishte Kryeministri. Ne bëmë një denoncim të madh ndaj tij kur deklaroi se Policia e Shtetit mund të merrte pjesë në zgjedhje. Ndaj ai nuk duhet të ishte Kryeministër sepse konsumoi haptazi një vepër penale.

A jeni i zhgënjyer nga rezultati i zgjedhjeve në përgjithësi?

Jo! Në radhë të parë jam i impresionuar për një gjë nga rezultati për rezultatin më të veçantë për atë që çfarë prodhuan të rinjtë si kredo dhe si rezultat për LSI. Praktikisht ishin zemra e procesit, ishin lajtmotivi i procesit dhe ishin edhe inspirimi i procesit. Dhe ishin në proces dhe prodhuan një rezultat të madh për mua. LSI në zgjedhje korrekte, në zgjedhje pa presion, në zgjedhje ku nuk frikësohen njerëzit, në zgjedhje ku nuk blihen votat sheshit. Këtë e pakën parë danez, suedez, amerikan të tërë e kanë parë dhe e kanë raportuar këtë që do të ketë pasoja jo të vogla dhe ne kemi bërë jo pak për të informuar jo vetëm brenda vendit, jo vetëm BE, jo vetëm Uashingtonin zyrtar por edhe agjenci të caktuara që merren me krimin elektoral por edhe me përzierjen e elementeve kriminal në politikë dhe e kemi bërë shumë mirë dhe me detaje dhe me fakte.

Ky votim i këtyre 230 mijë njerëzve të cilët në masë ishin të rinjtë dhe të cilët ishin të orientuar për një Shqipëri tjetër.

Sigurisht që do të ishte normalisht dyfishi i votave nëse do të kishim një klimë normale elektorale, por besoj se dhe këto 100 mijëra vota janë një themel betoni për një opozitë.

 

A jeni të bindur që LSI është e aftë të bëjë opozitë?

LSI-ja ka prodhuar që nën krye të herës opozitë. Ka lindur si opozitë, dhe opozita e LSI-së prodhoi një rezultat elektoral që në 2005 që nxori Patinë Socialiste në opozitë.

Drejtuesit e PS-së thonë që ju instaluat një sistem të korrupsionit dhe zgjedhjes?

Korrupsioni i vjedhjes më të frikshëm, është autori i vetëm i pakrahasueshëm dhe i jashtëzakonshëm në historinë e Shqipërisë, janë drejtuesit e PS. 95% të buxhetit të shtetit në Shqipëri e kanë qeverisur ata, drejtuesit e PS. Referojuni shifrave të buxhetit se çfarë kanë pasur nëse duar. Na kjo mijëra fermer nuk morën asgjë dhe ngritën fasadat e disa qyteteve dhe nuk kemi asnjë rezultat madhor. E dyta që dua të them, ju e dini shumë mirë dhe besoj se do të jetë një shqetësim madhor e analistëve që kanë në këtë studio sepse sot asnjë nga ju, duke përfshirë dhe ty, nuk e di se cila është e ardhmja dhe cilat janë objektivat që pret t’i nga qeverisja.

Kam parë mjaft komente së fundmi që thonë që njerëzit të cilët do të bëjnë opozitën në Parlamentin e Shqipërisë me Lëvizjen Socialiste për Integrim, janë njerëz që kanë shumë njerëz të tyre në strukturat e shtetit. Pra, me një këmbë në shtet, me një këmbë në opozitë…

LSI ka të gjitha fuqitë, ka shumë më tepër nga ç’dinë njerëzit për të bërë jo thjesht opozitë, por për të bërë një opozitë që të trondit. Nuk është thjesht çështje e 19 deputetëve të LSI-së, por e kualitetit që kanë ata me opozitën. Nuk kanë asnjë kapje nga pushteti. Salla e Kuvendit është atje. Ashtu sikurse e keni parë, që nga unë i pari si kryetar i Grupit Parlamentar të LSI-së, i kemi bërë një oponencë shumë të fortë qeverisë. Kujtoni edhe njëherë faktin se shumë thoshin që opozitën e vërtetë e bën LSI-a. Një raport i ri politik i cili na çlironte nga detyrimet e marrëveshjes politike që kishim, do të ketë një opozitë që nuk e keni parë, j vetëm këto katër vjet, por asnjëherë më parë.

A do të bashkëpunoni me Partinë Demokratike, pjesën tjetër të opozitës?

Ne kemi një aksion opozitar tonin, i cili do të jetë i drejtpërdrejtë dhe ballor. Sa herë që PD do të ketë të njëjtin qëndrim të drejtë, të drejtpërdrejtë dhe jo të kapur, atëherë nuk ka arsye se përse nismat të mos jenë të përbashkëta.

A do e dëmtojë Lëvizjen Socialiste për Integrim dhe aksionin e saj opozitar ikja e Metës nga Parlamenti?

Jo, nuk do ta dëmtojë fare. Lëvizja Socialiste për Integrim dhe i gjithë grupi i saj do të ketë një rendiment politik që do të jetë një performancë politike e një opozite që vërtet do t’ju lërë pa mend.

Vasili, keni punuar edhe me z. Rama, edhe me z. Berisha, pra keni qenë në qeverisje edhe me PD-në, edhe me PS-në. Me cilën nga këto dy forca politike ka qenë me e frytshme bashkëqeverisja?

Pa asnjë diskutim që Berisha ka qenë një drejtues serioz dhe nuk kanë asnjë pikë krahasimi midis seriozitetit dhe qëndrimit institucional të Berishës dhe Ramës. Berisha kishte një qeverisje me objektiva të qarta, të cilat tentonin gjithmonë të ishin objektiva madhore, ndërsa këtu kemi të bëjmë me objektiva fasada dhe sheshe, jo objektiva madhorë.

Burimi:( integrimi.al / E.S ) 

al}lsiLOGO_LRI_lgi
Selia Qëndrore

Rruga Sami Frashëri
Godina 20/10
Tiranë, Shqipëri

Zyra e Kordinatorëve

Tel: +355 4 2270 412
Tel: +355 4 2270 413

Zyra e Sekretariatit

Tel: +355 4 2258 665

Zyra e Shtypit LSI

Tel: +355 4 225 758

info@lsi.al, www.lsi.al