Meta: Vendi sot ka nevojë për më pak politikë dhe për më shumë ekonomi

fzh_9131Kryetari i Kuvendit, z. Ilir Meta mori pjesë në ceremoninë e diplomimit të Fakultetit të Ekonomisë në Universitetin e Tiranës, që u zhvillua sot në mjediset e Pallatit të Kongreseve.

Në fjalën e tij përshëndetëse, z. Meta shprehu vlerësimin e tij për këtë institucion të rëndësishëm të arsimit të lartë, ndërsa falënderoi për kontributin e tyre të vyer edhe disa nga profesorët më të njohur të Fakultetit të Ekonomisë.

“E mirëprita ftesën, sepse vazhdoj ta ndiej me shumë kënaqësi, por edhe përgjegjësi, veten time si pjesë të këtij fakulteti, të këtij institucioni mjaft të rëndësishëm të arsimit të lartë publik në vendin tonë, por edhe shumë të dashur për të gjithë ne që kemi studiuar këtu. Edhe unë i përkas një brezi të diplomuarish në Fakultetit e Ekonomisë, Universiteti i Tiranës, për të cilin ruaj kujtimet më të bukura, si çdo student. Gjej rastin të shpreh edhe një herë nderimin dhe vlerësimin e posaçëm për të gjithë profesorët, që nga Dhori Kule, Sulo Hadëri, Ahmet Mançellari e gjithë të tjerët”, – tha z. Meta.

Duke iu drejtuar studentëve, Kryetari i Kuvendi theksoi se kjo ditë simbolike për ta dhe për prindërit e tyre është, jo vetëm e mbushur me gëzim, por edhe shpërblimi ndaj përpjekjeve të tyre të jashtëzakonshme dhe sakrificave të panumërta të prindërve.

“Fakulteti i Ekonomisë i Universitetit të Tiranës është jo rastësisht një nga institucionet e para të arsimit të lartë në Shqipëri dhe përbën një nga burimet më të pashterueshme dhe më të çmuara në vite sa i takon përgatitjes së specialistëve, të kuadrove, dhe të drejtuesve të lartë për shoqërinë shqiptare, për ekonominë e saj dhe institucionet më të rëndësishme ekonomike, financiare, publike dhe private. Ai duket se harmonizon edhe sot përvojën e gjatë me cilësinë e lartë të aktivitetit arsimor, kërkimor e shkencor, të profesorëve, asistentëve dhe studentëve, për t’iu përshtatur dhe për t’u përballur, jo vetëm me sfidat ekonomike që shtrohen për zgjidhje në ekonominë e vendit tonë, por edhe për të qëndruar denjësisht në hapësirën konkurruese universitare dhe akademike në Shqipëri”, – nënvizoi z. Meta, ndërsa u shpreh se liberalizimi i arsimit të lartë ofron të tjera sfida dhe sipërmarrja për të mbetur në tregun e punës, të ekonomisë së tregut, dhe për t’i kontribuar asaj.

Gjithashtu, Kryetari i Kuvendit tha se proceset reformuese të arsimit të lartë përbëjnë një sfidë tjetër për të gjithë të diplomuarit dhe kërkon një angazhim ndryshe për t’iu përshtatur edhe me sukses këtyre proceseve.

“Besoj shumë se stafi juaj pedagogjik dhe akademik është me aftësinë dhe mundësinë e kërkuar për të qenë në krye të këtyre proceseve të rëndësishme, jo vetëm për arsimin e lartë, por edhe të kërkesave në rritje të ekonomisë sonë kombëtare. Zhvillimi ekonomik i një vendi modest si Shqipëria, kërkon domosdoshmërisht koncepte zhvillimore të reja rajonale dhe globale. Vendi ynë përfaqëson një treg modest, por mund të kthehet në një treg mjaft konkurrues dhe me interes vetëm duke u përfshirë aktivisht në bashkëpunimin ekonomik rajonal dhe proceset integruese të ekonomive të rajonit tonë”, – shtoi z. Meta.

Sakaq, Kryetari i Kuvendit, shprehu bindjen se nëpërmjet angazhimit në të ardhmen, kontributi i të sapodiplomuarve do të jetë një vlerë e shtuar për fakultetin dhe natyrisht për Shqipërinë e të ardhmen e saj.

“Sot është mbyllur një nga kapitujt më të rëndësishëm të jetës tuaj dhe nesër fillon një tjetër po aq i rëndësishëm ku ju do të merrni përgjegjësi të reja. Ju uroj nga zemra të gjithëve shumë fat dhe suksese në karrierën tuaj profesionale, duke qenë i bindur se nëpërmjet angazhimit tuaj në të ardhmen, kontributi juaj do të jetë një vlerë e shtuar për ju, për fakultetin tuaj, dhe natyrisht për Shqipërinë dhe të ardhmen e saj”, – theksoi z. Meta, teksa iu drejtua prindërve të pranishëm në këtë ceremoni, duke thënë se kjo është dita për të qenë si asnjëherë tjetër krenar e të lumtur për sakrificat dhe investimin që kanë bërë për arsimimin dhe edukimin e fëmijëve të tyre.

“Suksesi i tyre flet më shumë se çdo fjalët e imja sot. Vendi ynë sot ka nevojë për më pak politikë dhe për më shumë ekonomi. Jam i bindur që edhe ju do të kontribuoni në mënyrë që të çojmë më tej mendimin krijues ekonomik në vend. Ekonomia është një shkencë mjaft dinamike, ku duhet azhornuar çdo ditë dhe unë jam i sigurt që ju do të sillni risi, sepse jam i bindur për cilësinë e fakultetit. Një nderim të veçantë për pedagogët, të cilët kanë ditur të mbajnë lart emrin e këtij fakulteti, që kanë ditur të përgatisin gjenerata të tëra studentësh të përgjegjshëm, të aftë dhe me ambicie për të realizuar njohuritë e tyre. Suksesi juaj do të ndihmojë për të lartësuar edhe më tej emrin e këtij fakulteti mjaft të rëndësishëm e të dashur për të gjithë ne”, – tha ndër të tjera Kryetari i Kuvendit, z. Ilir Meta në fjalën e tij.

(Burimi:Integrimi.al/Xh.N)

 

Te shenuara si:
al}lsiLOGO_LRI_lgi
Selia Qëndrore

Rruga Sami Frashëri
Godina 20/10
Tiranë, Shqipëri

Zyra e Kordinatorëve

Tel: +355 4 2270 412
Tel: +355 4 2270 413

Zyra e Sekretariatit

Tel: +355 4 2258 665

Zyra e Shtypit LSI

Tel: +355 4 225 758

info@lsi.al, www.lsi.al