Monika Kryemadhi: Rama i ka bërë dëmin më të madh këtij vendi, duhet të përgjigjet

Kryetarja e Lëvizjes Socialiste për Integrim, znj. Monika Kryemadhi në një intervistë për portalin “Syri.Net” është pyetur mbi mendimin e saj mbi mbarëvajtjen e gjërave në qeverinë “Rama 2”  dhe për planet që opozita aktuale ka. Znj. Kryemadhi ka fajësuar kryeministrin Rama për gjendjen e vendit duke theksuar se Rama nuk kontrollon asgjë, por kontrollohet nga krimi i organizuar.

Më poshtë keni intervistën e plotë të znj. Kryemadhi:

Në fillim të mandatit të parë qeverisës Znj. Kryemadhi, demokratët pretenduan se qeveria në atë kohë po ushtronte dhunë, ndërsa Rama iu përgjigj që s’keni parë gjë akoma. Jua kthyet përgjigjen me katër vjet vonesë Kryeministrit duke i thënë se ai s’ka parë asgjë akoma. Konkretisht për çfarë e kishit fjalën?

Unë mendoj që Rama pas rezultatit të 25 Qershorit, ku deformoi totalisht votën e shqiptarëve, mendoj që e gjithë kusia, kazani, tepsia, timoni të gjitha i kishte vetë në dorë. Mendoj që do mund të bënte çfarë të donte dhe faktikisht drejt asaj rruge ishte. Ishte një strategji që e ndërtoi prej kohësh. Mendoi që të administronte totalisht një gjë të tillë. Në fakt ka ndodhur e kundërta, pavarsisht që ai mendon se është i forte, ai sot nuk është kryeministër i Shqipërisë. Është i rënë politikisht, moralisht por qëndron vetëm për shkak të institucioneve, por institucionet shtetërore institucione të cilat janë të paralizuara. Në mënyrë të tillë i bën të pamundur veprimtarinë e një shteti funksional dhe demokratik dhe kjo vjen për shkak të këtij sistemi që ai ka ndërtuar, duke menduar që do të kontrollonte çdo gjë. Faktikisht Rama nuk kontrollon asgjë, por Rama kontrollohet nga krimi i organizuar. Unë e kam thënë dhe e ripërsëris që është telekomanda, një instrument në dorën e krimit të organizuar, i cili përdor institucionet shqiptare për të arritur qëllimin e tyre. Dhe faktikisht, ajo që dua të them që ai nuk ka parë gjë akoma , është e vërtet që nuk ka parë gjë akoma, sepse për herë të parë në historinë e pluralizmit demokratik në Shqipëri, vetëm po të themi me zgjedhjet e ’96, do të kemi një situatë të tillë që shumë shpejt ndodhi,  por pas zgjedhjeve të ’96 ndodhën ngjarjet e ’97 të cilët sollën një situatë jo normale dhe shumë të dhimbshme për shqiptarët. Kemi po përsëri një situatë politike tashmë që menjëherë pas 6 javëve të sesionit të ri parlamentar dhe të legjislaturës së re parlamentare ne shikojmë që kemi një qeveri të destabilizuar, një parlament të destabilizuar, të izoluar.

Ju po lajmëroni më këtë që qeveria është një të njëjtën situatë siç ishte para vitit të mbrapsht ‘97

Absolutisht në atë situatë është, vetëm gjërat mund të jenë në ngjyra të ndryshme, pra mund të jetë një realitet i njëjtë për atë çka ndodh përsa i përket varfërisë së shqiptarëve. Në qoftë se në ’96-’97 shqiptarët humbën kursimet e tyre, tashmë po humbasin  shpresën, sepse kursime skanë më. Sepse gjatë gjithë kësaj kohë varfëria është instaluar dhe po rikthehet në një institucion zyrtar në Shqipëri, por tashmë në qoftë se në ’97 shqiptarët humbën kursimet, këtu shqiptarët po humbasin shpresën.

Shpresën e ngjall opozita Znj. Kryemadhi..

Sigurisht që edhe opozita do ta bëjë këtë gjë por mos harrojmë që është një opozitë e cila vjen menjëherë mbas një tronditje shumë të madhe siç ndodhi me zgjedhjet e 25 qershorit. Është një opozitë e cila është shpirtërisht e përgatitur për ta bërë opozitën, por nga ana organizative do t’i duhet kohë. Mos harrojmë që nuk ka bërë vaki asnjëherë që në 6 javët e para të qeverisjes së re të kemi një situatë të tillë.

 

Ju kanë kapur skandalet e qeverisë të papërgatitur si opozitë?

Ne si LSI nuk jemi të papërgatitur për këtë gjë, duke pasur parasysh që kjo ka qenë edhe një nga arsyet që LSI ka refuzuar koalicionin që herë pas here, z.Rama i bënte asaj përpara zgjedhjeve të 25 qershorit.

Edhe përpara zgjedhjeve?

Sigurisht. Po të mbani mend, edhe qëndrimi që mbante LSI për të detyruar Partinë Socialiste që të mos hynte në zgjedhje pa opozitën. Ka qenë dhe kjo le të themi një refuzim, duke pasur parasysh që ofertat e PS për koalicion bashkë me PS-në kanë qenë që në periudhën nëntor-dhjetor të vitit të kaluar.

Nuk jeni bërë pishman që e keni refuzuar koalicionin me PS-në?

Unë personalisht jo, madje jam e lumtur, sepse kjo i jep dinjitet dhe integritet Lëvizjes Socialiste për Integrim, sepse sot, mos u çudit, për shkak të një koalicioni dhe një fjale të dhënë, LSI mund të ishte edhe në llogore duke mbrojtur Edi Ramën, i cili është shkaktari i gjithë kësaj situate të mbrapsht që është krijuar në Shqipëri. Ajo çka dua të them, nuk është problemi këtu për të ruajtur apo për të mbrojtur figurën e LSI-së. Problemi është që qoftë LSI, qoftë PD, qoftë të gjitha forcat e tjera opozitare të cilat janë pjesë e Frontit kundër Krimit të Organizuar në Shqipëri, kundër qeverisë së NarkoShtetit, mendoj që është mision kombëtar për të përmbysur këtë realitet të dhimbshëm, të cilët shqiptarët me këtë qeveri tashmë u ka ngelur të kenë mik tersin dhe varfërinë, dhe të kenë armik zhvillimin, prosperitetin dhe begatinë. Është domosdoshmëri largimi i së keqes nga ky vend. Është shumë e domosdoshme, duke patur parasysh që ne sot nuk u ofrojmë asgjë shqiptarëve.

Si largohet kjo e keqe? Unë ju pyeta pak më herët në lidhje me reagimin disi të vakët të opozitës, dhe ju thatë që ne si LSI jemi gati. Nënkuptoni që pjesa tjetër e opozitës, që është partia kryesore, PD nuk është gati?

Ne jemi rakorduar me Partinë Demokratike përsa i përket veprimtarisë sonë opozitare, në parlament, përgatitjes së amendamenteve ligjore, përgatitjes së projektligjeve të ndryshme, diskutimeve, sjelljeve tona në parlament.

Imagjinoni nëse nuk do të bënit as këtë si opozitë..

Kjo nuk është e domosdoshme, sepse çdo parti ka programin e vetë, ka sjellën e vetë, ka ndasitë e veta. Nuk është e thënë të mbash sjelljet e tua, por e rëndësishme është që fillon një hap, është e rëndësishme që fillojmë të pranojmë njëri-tjetrin ashtu siç jemi, me atë çka ne përfaqësojmë. Duke pasur parasysh që Partia Demokratike ka ndasi të tjera politike, ne kemi ndasi të tjera politike. Pavarësisht nga kjo, ne do të ecim duke qenë më komod, duke qenë edhe më realist, edhe më të drejtpërdrejtë në opinione. Tashmë kemi filluar të bashkërendojmë grupet e punës me PD dhe LSI përsa i përket zhvillimit dhe organizimit të këshillave bashkiak nëpër Shqipëri. Të mos harrojmë që është një mekanizëm që nuk mund të lëvizi menjëherë. Është një mekanizëm, i cili lëviz me ngadalë dhe duhet hedhur me hapa të sigurt, sepse nuk duhet të bëjmë as rolin e bllofit, pra të luajmë me bllofin me qytetarët. Sepse qytetarët janë lodhur aq shumë nga politika shqiptare, saqë u ka ardhur në majë të hundës çdo lloj loje politike, që ne shikojmë  rëndom nëpër televizione, që ne shfaqim qoftë në parlament, qoftë në studio televizive. Njerëzit janë të lodhur, janë të neveritur dhe nuk kanë faj, sepse u bë gati 27-28 vjet që ne jemi në tranzicion.  Për këtë arsye mendoj që kemi dhe në një lloj përgjegjësie për këtë gjë, dhe duhet të bëjmë jashtëzakonisht shumë, dhe duhet të japim po jashtëzakonisht shumë në mënyrë të tillë që të bëjmë atë që meritojnë shqiptarët. T’ju rikthejmë besimin te institucionet e shtetit, tju rikthejmë besimin te politika shqiptare dhe mbi të gjitha t’ju rikthejmë besimin dhe te vendi i tyre. Sepse çdo ditë e më shumë Shqipëria po bëhet një vend i huaj për shqiptarët.

Znj.Kryemadhi e keni menduar ndonjëherë se si do të ishte opozita aktualisht, nëse do të drejtohej nga z.Berisha dhe z.Meta? Ju ka shkuar ndonjëherë nëpër mend?

Më ka shkuar. Besoj se po të drejtohej nga z.Berisha do të ishte shumë më…

Dhe z.Meta?

Po flas për z.Berisha njëherë. Do të ishte shumë më luftarake. Kjo vjen për shkak të karakterit, për shkak të tipit. Unë psh. për veten time, e gjej veten time më shumë në jetën, në angazhimin apo në ritmin, ndoshta për shkak sepse si verior që jemi të dy, që jemi emocional, entuziast, luftarak. Do të thuash ti edhe z.Basha është nga veriu. Po z.Basha është i shkolluar në Hollandë, është më demokrat, është më tolerant. Ndërsa për z.Meta them që z.Meta është  një strategjist shumë i mirë, pra e njeh strategjinë. Është shtetar. Në bazë të thelbit dhe politikës së tij ka stabilitetin. Unë gjithmonë them që është sadopak fajtor dhe ai për këtë situatë, sepse për hir të stabilitetit të Shqipërisë, për hir të reformës në drejtësi mbylli gojën dhe sytë përballë kriminalitetit që po instalonte Edi Rama në institucionet shtetërore, gjë që sot po e paguajmë. Po e paguajmë duke mos funksionuar Reforma në Drejtësi. Ne miratuam dhe votuam një Reformë në Drejtësi me 140 vota, gjë që nuk është miratuar asnjëherë, asnjë ndryshim kushtetues, me kaq vota, për shkak të këmbënguljes së z.Meta për të pasur një reformë në drejtësi më konsensus në mënyrë të tillë që të përfshiheshin të gjithë faktorët politikë. Ndërsa sot e kësaj dite kjo Reformë ka rënë, për të vetmen arsye sepse vetë klasa politike, ose vetë Partia Socialiste ajo që bënte rolin e prokurorit dhe të gjykatësit në jetën politike shqiptare është një nga faktorët që ndikon në moszbatimin e kësaj reforme. Megjithatë, ajo çka unë dua të them dhe nuk dua të ngelem peng i saj, është që çfarëdo të bëj klasa politike e ne të gjithë bashkë, vullneti popullor është shumë më i madh dhe më i fortë se i joni. Sigurisht që nuk është zgjuar akoma sepse njerëzit janë shumë të varfër, por edhe të lodhur edhe të neveritur nga politika. Do vijë një moment që nuk do durojnë më dhe do shpërthejnë, por do doja që ky reagim agresiv që do vijë nga shqiptarët, të mos bjerë mbi institucionet, por mbi njerëzit që e kanë shkaktuar atë gjë.

Jeni e bindur që do ketë një reagim të tillë nga shqiptarët?

Absolutisht. Ndihem unë e neveritur nga mënyra se si jemi qeverisur dhe pse kam qenë vetë pjesë e qeverisjes. Ndjej diferencën që nuk jam e barabartë qoftë me një deputet koleg  timin, qoftë i Maqedonisë apo i Kosovës, por kur nuk jemi ne deputetët të barabartë, si mund të jenë të barabartë qytetarët. Me atë liberalizim vizash që ne e fituam me shumë mundim para shumë vitesh, ne sot jemi më shumë nën lupën e ndërkombëtarëve nëse do të na i rikthejnë sërish vizat apo jo. Studentët rendin për të marrë një vizë, ku i duhen edhe muaj për braktisjen e shkollës së   tyre. Mënyra e diskriminimit apo procedurat që janë shtuar për limituar dhënien e vizave, e ka bërë shumë të lodhshme këtë realitet. Shpresoj që të vij një moment që gjërat të mos jenë më kështu. Jemi pak vonë, ne shqiptarët i kemi bërë gjithmonë gjërat me vonesë.

Thatë që z.Basha është natyrë tjetër nga ju sepse është shkolluar në Holandë. Çka do të thotë kjo, duke dalë tek qasja politike?

Unë kam thënë që z.Basha ka një mënyrë sjelljeje ndryshme, është më i qetë dhe tolerant në bashkëbisedime me Ramën. Kjo, ndoshta vjen edhe për shkak të mosnjohjes së Ramës, por ajo që dua të them unë midis Berishës dhe Bashës për të bërit opozitë, sigurisht që Berisha është opozitar i lindur. Nuk mund t’i krahasosh, janë dy gjëra komplet të ndryshme. Kështu që, të dy krijojnë frymëzim, por në këndvështrime të ndryshme. Unë shpresoj shumë tek z.Basha për shkak të moshës së tij të re. Shpresoj dhe tek çështja  që ai ka dëshirë se ky vend do të bëhet një ditë.

Një nga çështjet më kryesore të ditës pas kanabisit, tanimë i pranuar edhe nga kryeministri i cili i dërgoi një letër kryeministrave të vendeve të BE-së, ku i kërkonte ndihmën e tyre për të përballuar situatën.  Gjithashtu ka plasur skandali i përgjimeve. Ju keni informacione  apo i ka vetëm PD sepse ata po reagojnë.

Ne si klasë politike, nuk mund ta bazojmë luftën tonë politike tek përgjimet. Ne duam ta bazojmë luftën tonë tek programet që ofrojmë për qytetarët. Mendoj që shqiptarët mund të jenë të interesuar për të dëgjuar se çfarë diskuton Monika në telefon se është pak intrigues, por në fund të ditës qëllimi ynë është se çfarë do i çojmë fëmijëve për t’i ushqyer në shtëpi dhe e ardhmja e tyre e ndërtuar në këtë vend. Ajo çfarë dua të them është që problemi ynë më i madh që kemi sot është problemi i kriminalizimit të institucioneve tona dhe kjo më duket demagogji nga z. Rama që kërkon ndihmë nga institucionet ndërkombëtare. Gjëja e parë që mund të bëjë z. Rama është të japë dorëheqjen dhe të largohet. Është një demagogji që ai bën. Ai për marrëdhënie me publikun është shumë i mirë. Ai ka arritur t’i gënjejë shqiptarët në gjithë këto vite, duke treguar që është njeriu i duhur për Shqipërinë. Por në fakt ky është njeriu i duhur për krimin e organizuar, për të zaptuar institucionet e shtetit shqiptar, që nuk ka bërë vaki në asnjë vend.

Por kur këto i thoshte Ylli Manjani si nënkryetar i LSI-së, ju e shitët atë apo jo?

Jo ne nuk e shitëm. Z. Manjani u shkarkua nga z. Rama.

Dhe ju e pranuat.

Unë nuk e kam pranuar personalisht. Sigurisht që LSI do të merrte vendimet shumicës. Unë isha pakicë. Kam votuar kundër shkarkimit. Nuk kam asnjë lloj kompleksi në këtë drejtim. Unë e kam thënë dhe do ta them gjithmonë që në momentin që ai zotëri shkarkoi z. Manjani, LSI duhet të ishim larguar nga qeveria, edhe pse ai i kishte votat në Grupin e Partisë Demokratike. Këtë e dinë shumë mirë edhe vetë deputetët e PD-së. Ata e dinë më mirë se ne që edhe po të largoheshim ne nga qeveria Rama i kishte votat për të bërë qeverinë tjetër.

Është kjo arsyeja pse nuk u largua LSI-a?

Ky ishte një moment i një zgjidhjeje momentale që e morën në atë kohë drejtuesit e LSI-së. Unë nuk kam qenë asnjëherë në asnjë nga takimet që është bërë mes PS-së dhe LSI-së.

Keni refuzuar apo…?

Po kam refuzuar. Nuk kam dashur asnjëherë të përfshihem në bisedat që janë bërë me ta për shkak se e dija shumë mirë sjelljen e tyre. Janë jo korrekt në marrëveshje dhe e dyta kanë problemet e tyre që sot pak nga pak po iu dalin si me pikatore. Kështu që kjo është një gjë që ju mund ta shikoni në atë këndvështrim atë që thatë për z. Manjani ndërkohë që unë e shikoj si një reagim që Partia Socialiste donte t’i mbyllte gojën dikujt që kërkonte ndërhyrjen e ushtrisë për ç’kanabizimin e Shqipërisë. Dhe në fakt ne sot kemi një Shqipëri jo vetëm të kanabizuar, por një Shqipëri të drogëzuar. Kanabisi tashmë është bërë sikur të ishte misër dhe presh në bahçe. Sot është bërë çështje shumë e rëndësishme ajo e drogave të rënda, të cilat 2.4% të fëmijëve të shqiptarëve kryesisht pijnë kokainë. Pra janë gati 70 mijë të rinj që pinë kokainë. Nuk po flas më për drogat e tjera të rënda, të cilat janë prezentë në shkollat tona, një gjë shumë e rëndë për shoqërinë shqiptare. Sot ne e kemi shumë të vështirë të gjejmë njerëz sepse njerëz me pak tru që kanë ngelur në Shqipëri po paketojnë plaçkat dhe po ikin për një jetë më të mirë. Ne çdo ditë e më shumë po u shkatërrojmë çdo mundësi shqiptarëve.

Po diskutohet këto ditë çështja e Kryeprokurorit të ri. Nëse zgjidhet ai me shumicë të thjeshtë mendoni se kjo do të ulë ‘gjakrat’ midis prokurorisë dhe qeverisë për disa nga çështjet që po diskutohen?

Rama me grupin e tij ka gati 3-4 vite, që kur e filloi ta promovonte reformën në drejtësi, e bëri Prokurorinë si një institucion që tregonte hapur që donte ta kapte dhe ta kishte një instrument në dorën e tij për të bërë veprimet e veta politike apo për të vazhduar lojën e tij politike. Kështu që edhe Prokurori i Përgjithshëm është një element por unë nuk mendoj që ka një rëndësi. Çdo ditë e më shumë që ai kërkon ta marrë me dhunë këtë institucion tregon që ai ka akoma frikë dhe ndihet i frikësuar nga ajo që do t’i vijë më pas. Sigurisht që ai i di shumë më mirë se ne çfarë ka bërë sepse ai është krijuesi i të gjithë kësaj skeme kriminale në Shqipëri. Kështu që ai e di se çfarë e pret. Ne sigurisht që jemi të qetë në jetën tonë.

Çfarë e pret znj. Kryemadhi dhe cili do të jetë roli i LSI-së në të gjithë atë se çfarë e pret Kryeministrin në të ardhmen?

Unë mendoj se ai që i ka shkaktuar dëmin më të madh Shqipërisë është ai që duhet të dalë para drejtësisë më shumë nga çdo njeri tjetër. Këtu nuk është më çështje këpuce, ore apo çante por këtu është çështje që ke cenuar sigurinë e një vendi që është anëtar i NATO-s. Radarët e Shqipërisë janë edhe të NATO-s. Ke shkatërruar sigurinë e një vendi i cili ka qenë një nga kontribuuesit kryesorë të stabilitetit në rajon. Sot është kthyer në një nga kontribuuesit kryesorë të destabilitetit në rajon. Këtë nuk ta falin as fqinjët dhe as institucionet ndërkombëtare që kanë investuar jashtëzakonisht shumë.

Flisni gjithnjë për zullumet e këtij Kryeministri por kurrsesi për aksionin e opozitës?

Unë jam e gatshme të dal në rrugë por e vetme nuk bëj dot asgjë. Bashkimi e bën fuqinë. Tani për tani njerëzit janë shumë të paqartë.

Unë pranoj të dal në rrugë. E bindni ju dot z. Basha të vijë në rrugë me ne?

Sigurisht. Dhe ai është gati të dalë në rrugë por problemi është se në momentin kur del në rrugë nuk ka më kthim prapa. Dhe shqiptarët që të vijnë në rrugë duan të dëgjojnë një alternativë. Alternativa që do tu ofrojmë shqiptarëve nuk mund të jetë të zëvendësojmë një Edi Ramë me një Edi Ramë tjetër. Alternativa që duhet tu ofrojmë shqiptarëve është që tu ofrojmë një të ardhme. Boll me drekat, darkat, boll më marrëveshjet e natës. Tashmë çdo marrëveshje duhet të jetë institucionale, duhet të jetë transparente, duhet të jetë transparente për publikun, transparente për partitë, transparente për jetën politike, sepse në kaq vite tranzicion kemi qenë gjithmonë viktima të marrëveshjeve të fshehta, të cilat gjithmonë ata që e kanë bërë, e kanë pësuar të parët, por më shumë nga të gjithë e ka pësuar populli. Sepse në fund të fundit, nuk ka faj populli për gabimet e politikës. Gabimet politike nuk kanë përse të lënë me periudha të tërë shqiptarët jo vetëm të varfër, por edhe të shpërbërë kombëtarisht, edhe të shpërbërë edhe nga ana ekonomike, familjare etj. Kështu që them që kjo gjë do të vijë hap pas hapi. Sigurisht që njerëzit akoma nuk janë të bindur për atë çka ka ndodhur, akoma janë të trullosur. Më shumë janë të trullosur socialistët vetë për atë çka u ka ndodhur, sepse faktikisht po të shohim pushteti nuk po ndahet mes socialistëve, por po ndahet mes bandave, po ndahet midis grupeve mafioze, midis klaneve, midis të pasurve të Shqipërisë. Dhe buxheti I 2018-ës është fakt se si ndodh që të pasurit pasurohen, pra 1% e shqiptarëve pasurohen nga ulja e taksave që ndodh vetëm për ta, dhe 99% e shqiptarëve varfërohen nga rritja e taksave që ndodh vetëm për ta. Vetëm në Shqipëri ndodh kjo. Amerika i ka ulur taksat, i ka bërë sa Shqipëria 20% për korportatat shumëkombëshe që të kthehen në Amerikë. Ne ato dy-tre kompani të mëdha biznesi që kemi, që i përmend Z.Rama me shumë qejf në televizione ato po ngrihen dhe po transferohen nga Shqipëria në Maqedoni.  Pse? Sepse qenka klima e biznesit më e mirë në Maqedoni, sepse shteti nuk e ka armik biznesin, por e ka partner, ndërsa në Shqipëri bizneset i kemi armiq. Po ishe me mua, je me mua, nuk paguan as taksa, asnjë gjë. Po nuk ishe me mua, je armiku im. Falimentoje, gjobite, kontrolloje, bëji nga gjërat më të ndryshmet. Pse? Sepse kështu i do qejfi Edi Ramës apo ushtarëve të Edi Ramës. Nuk mund të ndërtosh ti një vend në mes të Europës me taksidarë që u marrin frymën shqiptarëve dhe hallexhinjëve.

Burimi: (integrimi.al/T.I)

al}lsiLOGO_LRI_lgi
Selia Qëndrore

Rruga Sami Frashëri
Godina 20/10
Tiranë, Shqipëri

Zyra e Kordinatorëve

Tel: +355 4 2270 412
Tel: +355 4 2270 413

Zyra e Sekretariatit

Tel: +355 4 2258 665

Zyra e Shtypit LSI

Tel: +355 4 225 758

info@lsi.al, www.lsi.al